Астана жаппай тазалыққа шықты. «Таза Қазақстан» аясындағы жалпы қалалық экологиялық акцияға 50 мыңға жуық адам қатысып, бір күнде 300 тоннаға жуық қалдық жиналып, шығарылды, деп хабарлайды DKNews.kz.
Қала әкімдігінің ресми сайтының мәліметінше, тазалық пен абаттандыру жұмыстары елорданың барлық ауданын қамтыды. Акцияға 3 800-ге жуық кәсіпорын, ұйым мен мекеме және шамамен 1 мың ПИК пен МИБ қосылды.
Бір күнде 4 390-нан астам аула тазаланды
Акцияның ауқымын тұрғындар санымен қатар тазартылған аумақтардың көлемі де көрсетеді.
Бір күн ішінде қатысушылар:
- 4 390-нан астам ауланы ретке келтірді;
- 156 саябақ пен гүлзарды тазалады;
- 131 әлеуметтік нысанның аумағын абаттандырды;
- 1 563 бизнес және өнеркәсіп нысанының аумағын тазалады;
- 27 тарихи-мәдени ескерткіштің маңын ретке келтірді.
Жұмысқа 607 арнайы техника жұмылдырылды. Нәтижесінде қала бойынша 300 тоннаға жуық қалдық жиналып, шығарылды.
155 аялдама мен 2,7 шақырымнан астам жол қоршауы жуылды
Жалпы қалалық акция аулалар мен саябақтарды тазалаумен шектелген жоқ. Коммуналдық қызметтер көше инфрақұрылымын санитарлық тазартуға кірісті.
Акция барысында 155 аялдама павильоны жуылды. Сонымен бірге шамамен 2 750 метр жол қоршауы тазартылды.
Әлеуметтік және коммерциялық нысандарға да жеке назар аударылды. Бір күнде 131 әлеуметтік мекеме мен 1,5 мыңнан астам бизнес және өнеркәсіп нысанының аумағы ретке келтірілді.
Астанада бір күнде 2,5 мыңға жуық ағаш отырғызылды
Акцияның екінші ірі бағыты көгалдандыру болды.
Елорданың әр ауданында ағаш отырғызылып, жасыл аумақтар абаттандырылды. Бір күннің ішінде қала бойынша 2,5 мыңға жуық ағаш егілді.
Бұл биылғы көгалдандыру науқанының бір бөлігі. Қыркүйекте Астанадағы «Таза Қазақстан» шаралары бірнеше ауданда қатар өтіп, тұрғындар, студенттер, ардагерлер, кәсіпкерлер мен коммуналдық ұйымдардың қызметкерлері ағаш отырғызуға қатысып келеді.
50 мың адам мен 3 800 ұйым акцияға қосылды
Бұл жолғы акцияның ерекшелігі — оған тұрғындармен бірге бизнестің, ұйымдардың және тұрғын үй бірлестіктерінің кеңінен қатысуы.
Жалпы қалалық жұмысқа:
- 50 мыңға жуық адам;
- 3 800-ге жуық кәсіпорын, ұйым және мекеме;
- шамамен 1 мың ПИК пен МИБ;
- 607 арнайы техника жұмылдырылды.
Әкімдік акцияның мақсатын қаланың тазалығын сақтау, аумақтарды абаттандыру мен көгалдандыру және тұрғындарды ортақ қалалық кеңістікке ұқыпты қарауға тартумен байланыстырады.
Экологиялық шаралар мұнымен аяқталмайды. «Таза Қазақстан» күзгі айлығы аясындағы тазалық және көгалдандыру жұмыстары елорданың барлық ауданында жалғасады.
Бұған дейін де елордадағы «Таза Қазақстан» акциясының ауқымы туралы жазған едік. Мәселен, 2025 жылғы күзгі сенбіліктердің бірінде Астананың 22 мыңнан астам тұрғыны тазалық жұмыстарына қатысып, 1 200-ден астам ағаш отырғызылған. Сол акцияға 2 мыңнан астам кәсіпорын мен ұйым және 600-ден астам арнайы техника жұмылдырылған.
