Артиллерия жылдам әрі дәл бола түсті.
Қазақстанда Зымыран әскерлері мен артиллерияның жауынгерлік мүмкіндігі енді тек зеңбірек пен зымыран кешендеріне емес, ұшқышсыз аппараттарға, автоматтандырылған басқару жүйелеріне және мамандар даярлау сапасына да тікелей байланысты, деп хабарлайды DKNews.kz.
4 қазанда Қазақстан Қарулы күштерінің Зымыран әскерлері мен артиллерия мамандары кәсіби мерекесін атап өтеді. Қазақстан Қорғаныс министрлігінің мәліметінше, бұл күн 2000 жылғы 4 қазанда Зымыран әскерлері мен артиллерия қолбасшысының басқармасы құрылған тарихи кезеңмен байланысты.
Нысананы анықтаудан соққы беруге дейінгі уақыт қысқарып келеді
Зымыран әскерлері мен артиллерия Құрлық әскерлерінің құрамына кіреді. Олардың міндетіне қарсыластың атыс құралдарын, әскери техникасы мен жеке құрамын жою, қорғаныс құрылыстарын талқандау және жалпыәскери бөлімдерге атыспен қолдау көрсету жатады.
Қазіргі артиллерияда басты басымдықтардың бірі — ақпаратты барынша жылдам алу және өңдеу. Барлау дрондары нысананы жедел анықтап, оның координаталарын беруге мүмкіндік береді. Ал автоматтандырылған басқару жүйелері мәлімет түскен сәттен бастап атыс тапсырмасын орындауға дейінгі уақытты қысқартады.
Бұл артиллерияның жұмыс тәсілін де өзгертеді. Енді алысқа ататын қарудың өзі жеткіліксіз. Нәтиже үшін барлау ақпараты, дәл координаталар, тұрақты байланыс және алынған деректі жедел түрде атысқа қажетті есепке айналдыратын басқару жүйесі қажет.
Қорғаныс министрлігінің дерегіне сәйкес, әскерлер заманауи артиллериялық барлау құралдарымен және атысты автоматтандырылған басқару жүйелерімен жабдықталған. Қару-жарақ құрамында минометтер, өздігінен жүретін артиллериялық қондырғылар, сүйретпелі зеңбіректер, гаубицалар, дүркіндете ататын реактивті жүйелер, сондай-ақ тактикалық және танкіге қарсы зымыран кешендері бар.
Дәл соққы үшін дронның өзі жеткіліксіз
Нысананың координатасын анықтау — жұмыстың бір бөлігі ғана. Атыс дәлдігі топогеодезиялық, метеорологиялық және баллистикалық қамтамасыз етуге де тәуелді.
Атыс тапсырмасын орындау кезінде өз позициясының және нысананың координаталары, ауа райы жағдайы, сондай-ақ баллистикалық көрсеткіштер ескеріледі. Деректер неғұрлым дәл әрі жылдам берілсе, есептоптарға атыс кезінде түзету енгізуге соғұрлым аз уақыт кетеді.
Сондықтан қазіргі артиллерия бір мезетте бірнеше технологиялық бағытқа сүйенеді: барлау, навигация, байланыс, автоматтандырылған басқару және кәсіби даярлық.
Қорғаныс министрлігі Зымыран әскерлері мен артиллерияны барлау, навигация және атысты басқару құралдарымен жоспарлы түрде қайта жарақтандыру жалғасып жатқанын хабарлаған.
Жыл сайын 60-қа дейін артиллерия офицері даярланады
Жаңа техника оны толық пайдалана алатын маманды қажет етеді. Яғни әскери қызметші координатаны қабылдаудан бастап атыс деректерін есептеп, тапсырманы орындауға дейінгі бүкіл тізбекті меңгеруі тиіс.
Құрлық әскерлерінің Әскери институты жыл сайын 60-қа дейін артиллерия офицерін даярлап шығарады. Оперативтік-тактикалық буын офицерлері Қазақстан Республикасының Ұлттық қорғаныс университетінде даярланады.
Әскери даярланған резервті қалыптастыруға Қарағанды техникалық университеті мен Satbayev University әскери кафедраларының түлектері де қатысады. Сержанттар әскери колледжде, ал артиллериялық және минометтік есептоптарға арналған кіші мамандар Құрлық әскерлерінің оқу орталығында даярланады.
Осылайша мамандар даярлау жүйесі бірнеше деңгейден тұрады: нақты қару-жарақпен жұмыс істейтін есептоп мүшелерінен бастап бөлімшелерді жоспарлап, басқаратын офицерлерге дейін.
Кәсіби мереке 2000 жылдан бастау алады
Зымыран әскерлері мен артиллерия күні Қазақстан Қарулы күштерінің қалыптасу тарихындағы нақты оқиғамен байланысты. 2000 жылғы 4 қазанда Зымыран әскерлері мен артиллерия қолбасшысының басқармасы құрылды.
Қазақстан артиллериясының қалыптасуы мен дамуына бірнеше буын әскери мамандары үлес қосты. Олардың қатарында генералдар Лут Альчекенов, Асқар Жоламанов, Руслан Шпекбаев, сондай-ақ полковниктер Михаил Шлейко, Дәурен Есхожин, Николай Мисюра, Виктор Кашоид, Александр Тепляков, Анвар Узбеков және Гинияткали Шалабаев бар.
Қазіргі артиллериядағы басты өзгеріс айқын: тиімділік енді тек қарудың қуатымен өлшенбейді. Нысананы анықтау, координатаны беру, есеп жүргізу және атыс тапсырмасын орындау арасындағы уақыт шешуші факторлардың біріне айналып отыр.
Сондықтан бүгінгі артиллерияда дрондар мен автоматтандырылған басқару жүйелері гаубицалар, реактивті жүйелер және зымыран кешендерімен біртұтас технологиялық тізбекке бірігеді.
