Қазіргі уақытқа дейін Алашанькоу шекаралық өткізу пункті арқылы Қытай–Еуропа және Қытай–Орталық Азия бағыттары бойынша 2000-нан астам жүк пойызы өткен. Бұл туралы жергілікті кеден қызметі хабарлады, деп хабарлайды Xinhua.
Атап өтілгендей, осы өткізу пункті арқылы өткен Қытай–Еуропа бағытындағы пойыздар саны ел бойынша бірінші орынға шыққан.
Қытай–Еуропа жүк пойыздары үшін «алғашқы дәліз» ретінде Алашанькоу өткізу пунктінде «ақылды теміржол порты плюс жергілікті жерде жедел кедендік ресімдеу» моделі енгізілген. Соның арқасында пойыздар шекарадан өткен бойда кедендік декларациядан өтіп, рәсімдеу үдерісі едәуір жеңілдетілді.
Теміржол құрамдарын тексеру жүйесі дәстүрлі «әр вагонды қолмен тексеру» тәсілінен «инвазивті емес интеллектуалды бақылау» жүйесіне көшірілді. Бұл бір пойызды тексеру тиімділігін орта есеппен 70 пайызға арттыруға мүмкіндік берді. Кедендік ресімдеу мен тексеру процестері үздіксіз режимде жүзеге асырылады.
Кеден қызметкерлерінің айтуынша, қазіргі уақытта пойыздардың өткізу пунктіндегі тоқтау уақыты айтарлықтай қысқарған, ал кәсіпорындардың кедендік рәсімдеуге жұмсайтын шығындары да едәуір азайған. Биыл Алашанькоу кеденінің бақылауымен өткен Қытай–Еуропа және Қытай–Орталық Азия бағытындағы жүк пойыздарының саны өткен жылмен салыстырғанда 19 күн бұрын 2000-ға жетті. Сонымен қатар тәуліктік ең жоғары көрсеткіш жаңарып, 35 пойызға жетті.
Үрімжі бөлімшесінің «Қытай темір жолдары» мемлекеттік корпорациясының қызметкері әрбір жүк пойызының шекарадан қауіпсіз әрі уақытылы өтуін қамтамасыз ету үшін барлық шаралар қабылданып жатқанын атап өтті. Оның айтуынша, тиімді көлік қызметтері халықаралық экономикалық және сауда байланыстарын қолдауға ықпал етеді. Қазіргі уақытта өткізу пункті арқылы тәулігіне орта есеппен 23 пойыз өтеді.
Бүгінгі күні Алашанькоу өткізу пункті арқылы Қытай–Еуропа және Қытай–Орталық Азия бағыттары бойынша 128 маршрут жұмыс істейді. Бұл бағыттар Қытайды Германия мен Польшаны қоса алғанда 21 елмен байланыстырады. Тасымалданатын тауар түрлері 200-ден асады, олардың қатарында автокөлік бөлшектері, электроника және күнделікті тұтыну тауарлары бар.
