Қытай табиғи ресурстар активтерін басқарудың институционалдық жүйесін жетілдіруге арналған нұсқаулықты жариялады. Құжат табиғи ресурстарды қауіпсіз, тиімді әрі орнықты пайдалануға, сондай-ақ табиғи активтердің сақталуы мен олардың құнын арттыруға бағытталған.
4 шілдеде қабылданып, Қытай Коммунистік партиясы Орталық комитетінің кеңсесі мен Қытай Мемлекеттік кеңесінің кеңсесі бірлесіп жариялаған нұсқаулықта табиғи ресурстарды кешенді қорғауды күшейтуге, оларды тиімдірек бөлуге, актив иелерінің құқықтары мен мүдделерін қорғауды жақсартуға және бақылауды күшейтуге шақырылады.
Құжатқа сәйкес, 2030 жылға қарай Қытай жауапты субъектілердің міндеттері нақты айқындалған, табиғи ресурстар активтері туралы мәліметтері толыққанды қалыптастырылған, оларды кешенді қорғау күшейтілген, активтерді бөлу тиімділігі арттырылған, сондай-ақ бағалау мен бақылау тетіктері жетілдірілген сенімді жүйе құруды жоспарлап отыр.
Нұсқаулықта 2035 жылға қарай табиғи ресурстар активтерін басқару тетіктері толыққанды жұмыс істеп, осы саладағы жүйелі әрі кешенді институционалдық жүйе толығымен қалыптасуы тиіс екені көрсетілген.
Құжатта табиғи ресурстарды бірыңғай зерттеу, мониторингтеу және бағалау жүйесін, сондай-ақ олардың активтерін түгендеу мен есепке алу жұмыстарын жетілдіру қажеттігі атап өтілген.
Сонымен қатар табиғи ресурстарға меншік құқықтары жүйесін жетілдіру, меншік құқығы мен пайдалану құқығын ажырату, табиғи ресурстар мен жылжымайтын мүлікке құқықтарды бірыңғай тіркеу жүйесін дамыту көзделген.
Нұсқаулыққа сәйкес, егер белгілі бір аумақтағы әртүрлі табиғи ресурстар бір пайдаланушы тарапынан кешенді түрде игерілетін болса, заңнамаға сәйкес оларды біріктіріп бөлуге жол беріледі.
Бұдан бөлек, құжатта табиғи ресурстар активтерінен түсетін кірістерді басқаруды, бақылау, бағалау және есептілік жүйесін күшейтуге, заңнаманы және құқық қолдану тәжірибесін жетілдіруге, ғылыми-технологиялық және цифрлық қолдауды кеңейтуге, сондай-ақ осы саладағы жасыл қаржыландыру қызметтерін дамытуға шақырылады.
