Қытай ғарыш қоқысын бақылауға арналған алғашқы коммерциялық спутниктік топтаманы құруға кірісті. Жоба әртүрлі орбиталардағы нысандарды тәулік бойы бақылайтын 120 спутниктен тұратын желіні орналастыруды көздейді.
«Ганде» топтамасының алғашқы спутнигі «Лицзянь-1» коммерциялық зымыран-тасығышының көмегімен орбитаға сәтті шығарылды. Жобаны әзірлеушілердің мәліметінше, бұл бастама Қытайдың ғарыш қоқысын бақылау мүмкіндігін едәуір кеңейтіп, ғарыш кеңістігіндегі қозғалысты басқарудың тиімділігін арттыруға мүмкіндік береді.
Спутниктік топтаманы 2030 жылға қарай үш кезеңмен толық орналастыру жоспарланған. Бірінші кезеңде төмен, орта және жоғары орбиталардағы нысандарды бақылауға арналған 14 спутник ұшырылады. Олар бақылау жүргізу, нысандарды сүйемелдеу және төтенше жағдайларға ден қою міндеттерін өздігінен орындай алатын жасанды интеллект жүйелерімен жабдықталған.
Мұндай жүйелерге деген қажеттілік ғарыш қоқысының көбеюіне байланысты артып отыр. Мамандардың бағалауынша, бүгінде Жер маңындағы орбитада көлемі бір сантиметрден асатын бір миллионнан астам қоқыс бөлшегі бар және олар ғарыш аппараттарына елеулі қауіп төндіреді.
