Қытай Халық Республикасының Қазақстандағы Елшілігі Астанада Қытай Халық Республикасының құрылғанына 77 жыл толуына орай қабылдау өткізді. Іс-шараға Қытай Халық Республикасының Қазақстандағы Елшісі Хань Чуньлинь және Қазақстан Республикасы Премьер-министрінің орынбасары – Ұлттық экономика министрі Серік Жұманғарин қатысты.
Қабылдауға 600-ге жуық адам — Қазақстан үкіметі мен парламентінің, дипломатиялық корпустың, халықаралық ұйымдардың, қытайлық кәсіпорындар мен диаспораның өкілдері, сондай-ақ Қазақстанда білім алып жүрген қытайлық студенттер қатысты.
Іс-шарада сөз сөйлеген Хань Чуньлинь Қытайдың әлеуметтік-экономикалық даму саласындағы жетістіктері және 15-бесжылдық жоспарды жүзеге асыру кезеңіндегі елдің негізгі міндеттері туралы айтып берді. Елші Қазақстан мен Қытай ынтымақтастығының келешегіне ерекше назар аударды.
Оның айтуынша, Қытай Қазақстанмен бірге екі мемлекет басшылары қол жеткізген уағдаластықтарды дәйекті түрде жүзеге асыруға, саяси өзара сенімді нығайтуға, өзара тиімді ынтымақтастықты кеңейтуге, екі ел халықтары арасындағы байланыстарды дамытуға және даму стратегияларының сабақтастығын күшейтуге дайын.
«Күш-жігерімізді біріктіре отырып, біз Қытай мен Қазақстан қарым-қатынасының жаңа "алтын отыз жылдығын" құрамыз, Қытай мен Қазақстанның ортақ тағдыр қауымдастығын құруда жаңа нәтижелерге қол жеткіземіз және елдеріміз бен халықтарымызға одан да зор игілік әкелеміз», — деп атап өтті Хань Чуньлинь.
Серік Жұманғарин Қазақстан үкіметінің атынан Қытай халқын Қытай Халық Республикасының құрылғанына 77 жыл толуымен құттықтады. Ол Қытаймен мәңгілік жан-жақты стратегиялық әріптестікті дамыту Қазақстанның сыртқы саясатының басым бағыттарының бірі болып қала беретінін атап өтті.
Премьер-министр орынбасарының айтуынша, екі ел арасындағы қарым-қатынас өзара сенімге, құрметке, берік достыққа және ортақ мүдделерге негізделген.
