Қытай Кенияға денсаулық сақтау жүйесін нығайту және құрғақшылықтан зардап шеккен өңірлерге көмек көрсету үшін 2 миллион доллар көлемінде грант бөлді. Қаражат Кения үкіметінің сұрауына жауап ретінде берілді.
Грантты тапсыру рәсімі Найробидегі Кенияның Ұлттық қазынашылық мекемесінде өтті. Оған Қытай Халық Республикасының елшісі Го Хайянь, Ұлттық қазынашылықтың бас хатшысы Крис Киптоо және Қоғамдық денсаулық сақтау департаментінің бас хатшысы Мэри Мутони қатысты.
Қаражаттың жартысы — 1 миллион доллар — Эбола геморрагиялық қызбасының таралу қаупі жоғары және өте жоғары округтердің індетке қарсы дайындық деңгейін арттыруға бағытталады. Тағы 1 миллион доллар құрғақшылық салдарын жоюға арналған.
Көмектің бөлінуі Кенияда эпидемияға қарсы шаралардың күшейтілуімен тұспа-тұс келді. Сейсенбі күні ел билігі Эбола қызбасының сырттан әкелінген алғашқы жағдайы тіркелгенін хабарлады. Соңғы жеті жыл бойы Конго Демократиялық Республикасында тұрған науқас Найробидегі ауруханалардың бірінде ем қабылдау кезінде қайтыс болды.
Кения президенті Уильям Руто инфекцияның таралу қаупін азайту үшін мемлекеттік ведомстволарға елге кіру пункттеріндегі санитарлық бақылауды күшейтуді тапсырды.
Сонымен қатар Кения ұзаққа созылған құрғақшылықтың салдарымен, әсіресе қуаң және жартылай қуаң аймақтарда күресті жалғастырып жатыр. Метеорологиялық қызмет Эль-Ниньо климаттық құбылысымен байланысты жаңбырлы кезеңде су тасқындары болуы мүмкін екенін де ескертті.
Қытай елшісі Го Хайянь Бейжіңнің Қытай-Африка ынтымақтастығы форумы және Жаһандық даму бастамасы аясында Кениямен ынтымақтастықты дамытуға дайын екенін растады.
Өз кезегінде Крис Киптоо Қытай тарапына қаржылық көмекті жедел көрсеткені үшін алғыс білдірді. Оның айтуынша, бұл қаражат халық денсаулығын қорғау шараларын күшейтуге және құрғақшылықтан зардап шеккен өңірлерге қолдау көрсетуге мүмкіндік береді.
