Қытайдың екі өкілі БҰҰ-ның Азық-түлік және ауыл шаруашылығы ұйымы (ФАО) жасаған «100 қаһарман әйел» халықаралық тізіміне енді. Олар ауылдық аумақтарды дамытуға, жұмыс орындарын құруға және ауылдық қауымдастықтардағы әйелдерді қолдауға қосқан үлесі үшін атап өтілді.
Жарияланған 99 лауреаттың тізіміне Хубэй провинциясынан Юй Цзиньсю және Хунань провинциясынан Дун Миньфан енді. Жүзінші қатысушының есімі 15 қазанда Римдегі ФАО штаб-пәтерінде Дүниежүзілік азық-түлік форумы аясында өтетін марапаттау рәсімінде жарияланады.
Юй Цзиньсю Қытайдың дәстүрлі моксотерапия әдісі бойынша маман ретінде танымал. Бұл — арнайы емдік құралдарды жағып, дененің белгілі бір нүктелерін жылумен қыздыруға негізделген емдеу тәсілі. Аталған әдіс Қытайда ұлттық деңгейдегі материалдық емес мәдени мұра ретінде танылған. Соңғы 20 жылда Юй Цзиньсю 30 мыңнан астам маман даярлап, ауыл тұрғындарының кәсіп меңгеруіне, жұмысқа орналасуына немесе өз ісін ашуына көмектесті. Ол өз қызметінде әйелдер мен мүмкіндігі шектеулі адамдарға ерекше көңіл бөледі.
Дун Миньфан басқа жолды таңдады. Корпоративтік сектордағы мансабын тастап, туған жеріне оралған ол ауыл шаруашылығын дамытуға кірісті. Бүгінде Юэян уезіндегі екі кооперативті басқарады, күріш өндірісін механикаландыруды енгізеді, шағын фермерлік шаруашылықтарды қолдайды және ауыл әйелдеріне кәсіби дағдыларды меңгеріп, кәсіпкерлікті дамытуға көмектеседі.
ФАО-ның халықаралық бастамасы БҰҰ Халықаралық фермер әйелдер жылы деп жариялаған 2026 жылға орайластырылған. Оның мақсаты — азық-түлік қауіпсіздігін қамтамасыз ету мен ауыл экономикасын дамытудағы әйелдердің рөліне назар аударту.
Бағдарламаға қызығушылық жоғары болды: ФАО-ға 131 елден 609 өтінім түсті. Үміткерлер бірнеше кезеңнен тұратын тексеру мен бағалаудан өтті. Соның нәтижесінде халықаралық тізімге енгізілетін қатысушылар таңдалды.
Ұйымдастырушылар бұл әйелдердің жетістіктерін халықаралық деңгейде мойындау ауылдық аумақтарға қосымша инвестициялар тартуға, білім беру мен қаржы ресурстарына қолжетімділікті кеңейтуге, сондай-ақ аграрлық азық-түлік секторында еңбек ететін әйелдер үшін жаңа мүмкіндіктер жасауға ықпал етеді деп үміттенеді.
