Қытай мен Оманның орталық банктері екі ел арасындағы қаржылық ынтымақтастықты нығайтуға бағытталған 30 млрд юань (шамамен 4,47 млрд доллар) көлеміндегі валюталық своп туралы келісімге қол қойды.
Қытай Халық банкінің хабарлауынша, келісім бес жылға есептелген. Оның көлемі 30 млрд юаньды немесе 1,5 млрд Оман риалын құрайды.
Валюталық своп орталық банктерге ұлттық валюталармен өзара алмасуға мүмкіндік беріп, қосымша өтімділікті қамтамасыз етеді және екіжақты есеп айырысуды дамытуға жағдай жасайды.
Сонымен қатар тараптар цифрлық төлемдер және орталық банктердің цифрлық валюталары саласындағы ынтымақтастық туралы өзара түсіністік меморандумына қол қойды.
Қытай Халық банкі қол жеткізілген уағдаластықтар трансшекаралық цифрлық төлемдерді дамытуға, қаржылық байланыстарды тереңдетуге және екі елдің қаржы нарықтарының тұрақтылығын сақтауға ықпал ететінін атап өтті.
