Бүгін – Ғылымдағы әйелдер мен қыздардың халықаралық күні. Атаулы дата Біріккен Ұлттар Ұйымының Бас Ассамблеясының шешімі бойынша 2016 жылғы 11 ақпаннан бастап аталып өтіліп келе жатыр.
Әлемдегі және еліміздегі тек арулар білім алатын бірегей білім ордасы – Қазақ ұлттық қыздар педагогикалық университетінде әйелдер мен қыз балалардың ғылымға толық әрі тең қол жеткізуіне және олардың тең құқықтары мен мүмкіндіктерін қамтамасыз етуге, ғалым әйелдерге демеу көрсетуге, олардың ғылым мен техника салаларындағы ғылыми-зерттеу қызметіне қатысуын қолдауға бағытталған жобалар мен шаралар жүргізіліп келе жатыр.
Бүгінде оқу орны профессор-оқытушылар контингентінің 70 пайыздан астамын әйел азаматшалар құрайды.
– Соңғы 15 жылда дүние жүзі бойынша нәзікжандыларды ғылымға көбірек тарту бойынша көптеген істер жүргізуде. Десе де бұл тарапта олардың қатары көбеймей отыр. Ресми мәліметтерге сүйенер болсақ, әлем бойынша ғалым әйелдердің үлес салмағы 28,4 пайызды құрайды. Олардың басым көпшілігі бакалавр және магистрлер. Ал PhD докторлардың саны айтарлықтай аз. Біздің міндет осыны арттыру, – дейді әлемдік ұйым өкілдері.
