Бірыңғай жинақтаушы зейнетақы қоры салымшыларының зейнетақы жинақтарының сомасы 2021 жылғы 1 наурыздағы жағдай бойынша 12,6 триллион теңгеден асты. Бәрімізге белгілі, бұл сома зейнетақы жарналары мен инвестициялық табысты қамтиды, - деп хабарлайды Деловой Казақстан.
СР
2021 жылғы 1 қаңтардан 1 наурызға дейінгі екі айдың ішінде ғана БЖЗҚ салымшыларының шоттарына 217,9 млрд теңге мөлшерінде таза инвестициялық табыс есептелді, бұл өткен 2020 жылдың сәйкес кезеңімен салыстырғанда 78 млрд теңгеге (немесе 56% - ға) артық. Жыл басынан бері табыстылық 1,3% инфляция кезінде 1,7% құрады. Бұл ретте өткен 2020 жылдың осы кезеңінде 1,3% инфляция кезіндегі кірістілік 1,3% болған.
Егер жылдық кірістілікті қарастыратын болсақ, онда 2021 жылғы 1 наурыздағы жағдай бойынша 7,4% инфляция кезінде кірістілік 11,4% құрады. Ал өткен жылдың сәйкес кезеңінде, 2020 жылдың 1 наурызына қарай 6,0% инфляция кезінде кірістілік 7,8% болған еді.
Салымшылардың (алушылардың) зейнетақы жинақтарының сомасы зейнетақы активтерін инвестициялау нәтижелеріне сәйкес күн сайын қайта есептеледі және қайта бағаланады. Инвестициялық табыстың құрамына бағалы қағаздар (салымдар және басқа да операциялар) бойынша сыйақы, қаржы құралдарын нарықтық қайта бағалау, валюталық қайта бағалау, сыртқы басқарудағы активтер бойынша кірістер және т. б. кіреді.
Жалпы алғанда, барлық зейнетақы активтері БЖЗҚ-ға біріктірілген сәттен бастап Ұлттық банк қамтамасыз еткен инвестициялық табыс шамамен 4,9 трлн теңгеге жетті. 2021 жылдың 1 наурызына зейнетақы жинақтарының жалпы көлеміндегі таза инвестициялық табыстың үлесі 35,1% құрады
Егер Қазақстанның жинақтаушы зейнетақы жүйесі құрылған 1998 жылдан бергі кезеңді алып қарасақ, таза инвестициялық табыс шамамен 5,8 трлн теңге болды. Осы уақыт ішінде инвестициялық кірістілік өсу қорытындысымен 614,8% құрады. Ал инфляция 504,4% болды. Осылайша 2021 жылғы 1 наурыздағы жағдай бойынша зейнетақы активтерінің нақты табыстылығы 110,4%.
Айта кету керек, зейнетақы жинақтары – бұл ұзақ мерзімді инвестициялар және инвестициялық табыстың мөлшерін кемінде 1 (бір) жыл кезеңінде талдаған орынды. Қысқа мерзімді деректер (күнделікті, ай сайынғы және т.б.) көрсеткіш болып табылмайды, өйткені, олар күнделікті нарықтық жағдайға байланысты.
Инвестициялық басқару мен зейнетақы активтерін есепке алудың барлық жүйесі ашық: әрбір салымшы өзінің инвестициялық табысын enpf.kz сайтындағы жеке кабинеттен немесе ұялы қосымшаның көмегімен бақылай алады. БЖЗҚ-ның зейнетақы активтерін инвестициялық басқару және зейнетақы активтері орналастырылған қаржы құралдары туралы ақпарат Қордың ресми сайтындағы (www.enpf.kz) «Көрсеткіштер/Инвестициялық қызмет» бөлімінде жарияланып отырады.
